曼联领队兰历克被视为「战术大师」，不过佢嘅先进踢法似乎唔系太适合喺「红魔鬼」实施，周一(7日)凌晨「曼市打吡」喺C朗拿度、卡云尼等前锋缺阵下，兰历克竟用般奴费南迪斯同保罗普巴作为4-2-2-2嘅前锋，结果当然惨淡收场。

曼联季初有C朗、卡云尼、安东尼马迪尔、格连活特同拉舒福特5个前锋，但因为不同原因而「瓦解」，今场只剩拉舒福特候命，不过兰历克宁愿以般奴费南迪斯同保罗普巴客串，仍继续将拉舒福特放後备，曼联名宿加利尼维利批评：「我完全唔明呢个战术点样进攻？兰历克系用过『半前锋』踢法，但艾兰加同查顿辛祖企得太边，拉舒福特同桑马达会喺後备席谂『点解唔用我哋』。」

兰历克赛後话曼联头60分钟踢得唔错，但系曼联最後阶段完全被曼城「打爆」，数据显示佢哋喺最後10分钟只有16脚传球，包括1次失波後中圈重新开波；相反曼城中场洛迪卡斯简迪喺同一时间内，1个人已经有17次传球，踢到连个波都掂唔到，兰历克呢个战术好难称得上系成功。