周一(4日)凌晨英超大战，热刺主场以5比1大炒纽卡素，以得失球差压倒踢少2场嘅阿仙奴升上第4位。热刺王牌前锋哈利卡尼今场冇波入，但佢「转型」做中场发电机踢到出神入化，前法国球星真路拿更大赞佢犹如「马纳当拿上身」。

热刺今场占尽上风，不过先开纪录嘅系客队纽卡素，法比安舒哈39分钟罚球直射入网，热刺4分钟後即由宾戴维斯追平，半场踢成1比1平手。下半场热刺大爆发，48分钟哈利卡尼助攻马特杜靴迪入波领先，加上孙兴民、艾马逊同贝云积各建一功，协助热刺大胜5比1。

哈利卡尼今场冇入波，但佢控制比赛嘅能力相当突出，不断堕後中场校炮，用精准长传策动攻势，2次创造黄金机会同交出1次助攻，曾效力热刺同纽卡素嘅法国名将真路拿表示：「热刺呢个10号系球队发电机，佢踢到马纳当拿一样，长传、短传、入波、助攻...哗！呢个系全新嘅哈利卡尼！」