由碧咸出任班主嘅国际迈亚密，自2020年加入美职以嚟表现一直低迷，为咗扭转颓势，碧咸就计划喺7月转会窗，搵占士洛迪古斯救驾，希望呢位星味十足嘅哥伦比亚国脚，提升球队成绩。

近日「J神」去到美国迈亚密当地渡假，仲去埋睇NBA球队热火嘅比赛，与该队球星占美毕拿合照，似乎几享受喺当地嘅时光。据英国媒体报导，碧咸同国际迈亚密嘅球会代表，亦有同「J神」就转投美职事宜密密斟，期望喺7月美职转会窗开启嘅时候，邀请呢位哥伦比亚球星加盟。

现年30岁嘅「J神」，过去曾效力皇家马德里同拜仁慕尼黑等欧洲劲旅，近年佢转战卡塔尔联赛，效力当地球队艾雷恩，但依然系哥伦比亚国家队嘅主力。虽然已远离欧洲顶级联赛，但「J神」身价依然高企，为咗罗致呢位球星，国际迈亚密需要支付其逾800万美金嘅年薪，如果佢最终成功加盟，将成为球会历上最高薪嘅球队。

国际迈亚密2020年首登美职舞台，但战绩持续惨淡。今季球队暂时排名东岸12位，表现麻麻，其中头号球星希古恩嘅低迷状态被人诟病，已经被主帅菲腊尼维利弃用，国际迈亚密亦希望「J神」可以担起进攻重责。