利物浦今个夏天以8,500万镑收购达云纽尼斯，呢位乌拉圭前锋嘅一举一动都成为焦点，不过佢嘅「红军」生涯开局不似预期，继上仗首演对曼联空门射高，周五(15日)对水晶宫又上演门前10码「踢空气」虾碌，即时受到大批网民嘲笑，不过达云纽尼斯信心似乎冇受动摇，仲用一个字霸气回应。

达云纽尼斯今仗半场期间入替，但第1脚波就「出事」，当时穆罕默德沙拿右路传中，水晶宫球员伸尽只脚勉强叉中个波，企喺门前10码左右嘅达云纽尼斯未有准备，无人看管下起脚太慢变「踢空气」。呢位射手都勤於走动，亦有一似射门被水晶宫门将扑出，但连续2场失机嘅画面实在唔多好睇。

大批网民留言抽水：「利物浦签1个就顶晒卢卡古同迪姆华拿」、「佢瓦解入球嘅能力系个出色後衞」、「曼联逃过一劫」等等。不过，达云纽尼斯赛後就喺twitter留低一个字：Resiliencia，兼且有个「收声」嘅emoji，呢个字系源自拉丁文，有「反弹」嘅意思，预告佢之後表现会强力反弹。