正所谓新官上任三把火，曼联教头坦哈格今夏上任後立即出招，严格规限卡宁顿训练基地嘅草长要系15mm，不可多亦不可少，认为呢个长度最适合众将执行佢快速传波嘅打法。查实世界球坛有唔少主帅，为咗赢波都会奇招百出，无所不用其极，好多招数仲估佢唔到添！

摩连奴薯仔田招呼巴塞

讲到玩草地始祖，非「寸王」摩连奴莫属。2006年佢执教车路士期间，欧联16强撞正对巴塞隆拿，摩连奴刻意推迟重铺草地计划，搞到史丹福桥主场好似「薯仔田」咁烂地一样，希望影响巴塞嘅地面组织。

同时，「寸王」亦好重视「执波仔战术」，2019年佢教紧热刺，喺欧联对住奥林比亚高斯喺前场博到界外球，眼见对方慢吞吞回防，热刺执波仔第一时间将手上嘅波掟畀奥里亚快开，造就卢卡斯莫拉传中畀哈利卡尼建功，摩连奴赛後大赞执波仔醒目。

阿迪达贴金句饿狼反击战

古语有云「狭路相逢勇者胜」，阿仙奴拍摄嘅纪录片《All or Nothing》早前出咗预告片，其中一幕系主帅阿迪达企喺显示狼群图像嘅萤幕前，激励冇晒士气嘅球员：「依家我哋喺联赛排紧包尾，3连败0分兼0入球，但当个个睇死你哋嗰阵，就系你哋变番强大嘅时候。」背後嘅狼群寓意对胜利嘅饥渴感。

除此之外，训练基地周围仲贴上金句，包括着名剧集《权力游戏》嘅「凛冬将至」，意指面对敌人入侵时要做好应该做嘅事，虽然「兵工厂」上季临尾香失落前4，但总算反弹重上前列，达Sir呢招奏效。

修夫基军训操起少爷兵

英格兰近年喺领队修夫基带领下成绩大跃进，除咗因为肯重用一班年轻新星之外，佢仲有方法令呢班英超「少爷兵」成为勇悍战士，值得表扬。

修夫基喺2016年上任後，首要任务就系令阵中腰缠万贯嘅球员「硬起来」；喺2017年一场世盃外围赛对苏格兰前，修夫基拉队去英国皇家海军陆战队嘅训练中心特训，咪以为佢哋玩玩吓当参观，成个训练长达48小时，所有球员入Camp前被没收手机，除哈利卡尼、史达宁等球员要翻山落水咁练习，修夫基亦以身作则一齐操。

修夫基事後表示：「大家一直生活喺足球呢个小圈子，但其实世界好大，今次体验会令球员终生受用。特训令球队团结一致，建立出非常珍贵嘅团队精神。」

甸恩史密夫禁玩英超Fantasy

阿士东维拉为免军情外泄，前领队甸恩史密夫禁止球员玩英超Fantasy。

话说2021年维拉联赛迎战李斯特城，当时嘅队长基亚利殊受伤将会缺阵，原本咁重要嘅军情，梗系要保密。点知几名球员包括马特泰基特、尼尔泰莱同侯利汉尼，以及维拉物理治疗师同另一教练，都提前喺Fantasy游戏将基亚利殊转走，激到甸恩史密夫弹起。

维拉之後禁止所有人再玩，其他英超球会虽然无效法「禁玩令」，但就要求喺游戏唔可以再拣自己队友。

马加夫芝士沟酒精偏方疗伤

德国名帅马加夫曾经短暂执教富咸，当年爆出佢曾经提议大腿受伤发炎嘅球员轩治兰特，利用「偏方」医治，用酒精沟芝士敷伤口，爆料者系当时同佢有过节嘅前富咸队长丹尼梅菲。

不过马加夫其後澄清，自己确实有讲过德国有一个偏方，用奶渣（一种类似芝士嘅乳制品）帮助消炎，但自己从来冇干涉队医嘅诊断，亦冇要求队医一定要咁做，只系建议一下，但已经畀人断章取义。

曼城战术加入天文物理学

过去有唔少分析话曼城主帅哥迪奥拿教波手法媲美数学家，佢嘅传球路线喺数学几何上系黄金三角，其实哥帅为提升球队水平，真系请咗班天文物理学家加盟，为球队分析数据。

曼城对於邀请天文物理学家加入团队未有透露太多细节，仅向外声称技术团队专家当中，的确有物理学背景，主要协助「城市足球集团」所有球队做数据分析，所以赢波真系唔简单。

高普引入神经科学训练12码

高普教波除咗够热血，原来方法仲好先进；利物浦上季靠互射12码连捧英联盃及英足盃双冠，全因为高普同德国一间神经科学公司合作。该公司名为《Neuroll》，主要系向球员提供心理训练，令球员轻松面对12码，提高命中率。

利物浦球员喺练习期间，被影到头部戴上一个古怪仪器，据称系一个「脑部感应」装置，高普表示：「呢间公司主动搵利物浦，专门研发神经科学，话可以帮助训练12码同死球，我觉得几得意就同佢哋合作。」

同场追加球员篇：波索域「躺平」防守始祖

「躺平」唔代表冇作为，2018年欧联分组赛巴塞主场对国米，巴塞前锋苏亚雷斯喺禁区顶主射罚球，由於佢射地波，加上国米人墙跳起，以为会割草式直飞入网。点知国米中场波索域早有准备，当人墙即将跳起时，突然飞身瞓喺人墙後面，刚好挡走个波，令「哨牙苏」非常无奈。当时因伤坐喺场边嘅美斯，被吓到目瞪口呆，估唔到波索域有此一着。

经此一役之後，全球掀起「躺平」防守大法，唔少球队防守危险地带罚球时，都会搵球员瞓喺人墙後面补位，令对手无法偷鸡射地波，门将就可以专注扑高波。

同场追加球员篇：告鲁尔12码猫纸贴水壶

2020年英足盃16强，热刺主场同诺域治打和1比1，需要互射12码分胜负，诺域治门将告鲁尔扑出两个12码，协助球队爆冷晋级8强，令人啧啧称奇。

原来呢位荷兰钢门赛前做足分析工作，预测对方球员达云臣山齐士、卢施素、艾历迪亚、谢特臣费南迪斯、柏路特、拉美拿、史基比主射12码方向，并将写有扑救指示嘅「猫纸」贴喺水壶。

为荷兰扑走哥斯达黎加

告鲁尔扑救12码前，攞起水壶扮饮水，其实系睇「猫纸」，果然成功扑出柏路特同谢特臣费南迪斯嘅射门，成为赢波大功臣。正所谓「机会系留畀有准备嘅人」，2014年世盃8强荷兰对哥斯达黎加，告鲁尔完场前入替负责救12码，结果扑出两球，协助荷兰晋级，可见佢成功绝非侥幸。

同场追加球员篇：邦路斯食蒜味糖披甲大口气

喺古代，战士上战场前会食蒜头清醒头脑及保持健康强悍，祖云达斯後衞邦路斯喺2014年对罗马嘅大战之前，佢嘅教练费拉里尼建议佢食天然大蒜味糖，喺比赛途中将难闻嘅气味，「嘘」向罗马王子托迪，影响对方表现。

虽然唔知邦路斯比赛途中有冇用呢个「口气大绝」，但唔知系咪大蒜嘅帮助，邦路斯喺86分钟射入世界波，助祖记以3比2击败罗马。