周日(17日)早上喺美国举行嘅季前热身赛，车路士以2比1击败CF阿美利加，但主角并非入波功臣迪姆华拿、美臣蒙特，而系右後衞列斯占士及门将比迪尼利，2人梦游球场，合力制造世纪乌龙波，非常丑怪。

双方上半场互交白卷，全场3个入波都系来自後备上阵球员，55分钟列斯占士右路传中，迪姆华拿起脚被门将奥斯卡占美尼斯扑出，佢再补射入网。

5分钟後出现全场最「奇异」一幕，列斯占士喺禁区边右路转身回传，可能冇留意门将比迪尼利企位偏离龙门，比迪尼利回身出脚拦截，已鞭长莫及，只能睇住个波入网。

列斯占士唔带眼传波，固然要负责任，至於比迪尼利系车仔第3号门将，上季仅上阵1次，同队友欠缺默契，最终造成今次乌龙波，恐怕领队杜曹新一季更加唔敢畀呢位30岁门将上阵。

幸好比赛末段，美臣蒙特射入世界波，协助车路士赢2比1，否则列斯占士、比迪尼利就孭晒镬，车路士下仗热身赛将於7月21日早上对夏洛特FC。