C朗向曼联提出转会要求後，至今仍然未有归队迹象，唔少「魔迷」都已打定输数，据报有唔少买咗C朗波衫嘅粉丝，近期去到曼联官方商店要求「回水」，令曼联面临损失数十万镑收入。

虽然C朗已表达离队意愿，不过曼联新波衫宣传仍然以C朗作为主打，尤其保罗普巴离队後，基本上都系靠C朗孭飞，唔少球迷亦印上C朗件7号战衣，但随住C朗一直冇归队消息，球迷亦都冇晒耐性，消息人士向英国传媒爆料：「好多人去到曼联商品旗舰店，询问C朗一旦离队後嘅退款或者换波衫安排。」

曼联上年曾经作出类似安排，当C朗加盟後着咗卡云尼件7号，球会即安排买咗卡云尼波衫嘅球迷退款或换款，但消息人士表示：「曼联上年嘅做法好恰当，不过唔系对卡云尼不敬，事实上要帮C朗波衫退款嘅影响力，同卡云尼完全唔同层次。」报道指如果曼联用番上年嘅安排，将会损失6位数字收入。