曼联球星C朗去向众说纷纭，虽然佢本人想离队，但红魔鬼却拒绝出售，英国传媒指会方准备提出「折衷方案」，就系先同C朗续约，再将佢外借去「欧联球队」，令佢可以继续参加呢项大赛，等曼联下季获得欧联入场券後，届时C朗应该会乐意再为红魔鬼披甲。

据悉曼联教练团开始觉得强留C朗，唔会有幸福，因为新帅坦哈格近期热身赛已经制定冇C朗嘅战术，效果相当唔错，佢归队反而会影响部署，又要重新改变踢法。

加上C朗唔见人呢段日子，曼联内部和谐好多，一旦佢回归，随时会破坏气氛。

不过，基於商业原因，赞助商要求曼联唔好出售C朗，加上其他大球会亦唔多愿意以高薪签入呢位葡萄牙国脚。英国《镜报》指曼联有意同C朗续约，以满足赞助商要求，同时将佢外借去有份踢欧联嘅球队，帮C朗达成心愿。

曼联只要新一季夺得欧联资格，明夏再收回C朗，佢到时应该会专注为红魔鬼搏杀。