巴塞隆拿上年夏天因为财政问题，拒绝同美斯续约，但今夏却大花金钱增兵，招致唔少批评。巴塞会长拉波塔近日接受访问时，承认球会亏欠咗美斯，希望呢位35岁阿根廷国脚将来可以回巢，再次为巴塞隆拿比赛。

拉波塔话：「我认为美斯将来仲可以喺巴塞隆拿延续球员生涯，我哋亦有责任令佢同巴塞再续前缘，我觉得自己亏欠咗美斯，从感情上同道德上来讲，我希望美斯能够喺巴塞有个完美结局。」

美斯同巴黎圣日耳门(PSG)嘅合约将於明夏约满，PSG计划同佢续约至於2024年夏天，若然成事，呢位阿根廷球王可能要等到37岁先至重返巴塞，到时拉波塔仲会唔会签佢呢？