曼联王牌前锋C朗日前喺社交网上载自拍照，留言「Mood」表示自己心情靓，有球迷留言叫佢去加拉塔沙雷，竟然获得C朗回应畀Like，网民随即起哄，喺佢IG留言支持佢嘅决定。

呢件事最先系由一位网名xgizemlibir_genc嘅网民发起，佢叫C朗去土耳其班霸加拉塔沙雷，只系一句普通留言，但估唔到吸引到C朗注意，仲喺留言上畀Like。

C朗畀Like引发球迷起哄，纷纷留言支持C朗去土超，仲有留言话「虽然冇乜可能，但支持你去加拉塔沙雷」，就连足球网站433都整咗张P图，C朗穿上加拉塔沙雷球衣，一切都系C朗畀Like而起，可能佢只系唔小心揩到个掣，但喺呢个敏感时刻，咩都有可能。

C朗今夏有意离开曼联人尽皆知，佢想去一支联赛有竞争力，又有得踢欧联嘅球队，可惜拜仁、巴黎、车路士已相继拒绝，马体会、拿玻里、士砵亭又未有下文，估唔到连加拉塔沙雷都成为目标，真系该煨。