曼联近年成绩令人失望，而且多是非，赞助商都怕怕，红魔鬼球衣胸口广告赞助商德国科技公司TeamViewer，宣布2026年合约届满後，唔会同曼联续约，最讽刺系消息出街後，TeamViewer股价立即急弹5%，证明市场认为决定正确。

TeamViewer上年3月同曼联签下一份总值2.35亿镑嘅5年赞助合约，市场人士认为物非所值，TeamViewer股价由签约开始至今，已跌近80%，除咗因为俄乌战争及全球科技股急挫之外，斥巨资赞助曼联被指唔合乎商业效益，亦系股价大泻原因之一，难怪签约仅一年半，TeamViewer就急於宣布「止血」唔续约，希望令市场人士恢复对公司嘅信心。

TeamViewer声明指同曼联合作後，明显提升公司知名度，但考虑宏观经济环境及市场策略後，决定唔会续约。

今次事件反映曼联商业价值有下降趋势，球队对上一份同雪佛兰签订嘅球衣胸口广告赞助合约，每年可获6,400万镑收入，但同TeamViewer嘅合约下降至每年4,700万镑，若然曼联未来几年成绩再冇起色，恐怕下一份赞助合约将会再缩水。