荷兰足球复兴！周一(26日)凌晨欧国联A4组赛事，荷兰主场1比0再赢比利时，以5胜1和不败佳绩闯入欧国联4强，成为首支2度跻身欧国联4强嘅球队。荷兰自上年欧国盃後极速起飞，尹戈尔重掌帅印後15场不败，今仗更成为荷兰史上赢波次数最多领队，卡塔尔世盃有望创造佳绩。

荷兰喺首循环曾大炒比利时4比1，今场只要唔大败都可以晋级，虽然法兰基迪庄、迪比等主力因伤缺阵，但荷兰仍然有效抵抗比利时进袭，射门次数更比客队多，最终喺73分钟由华基尔云迪积克接应角球顶入全场唯一入球，助荷兰1比0「双杀」比利时，拎到首名晋级4强。

自上年欧国盃16强出局後，荷兰邀请尹戈尔回巢执教，球队喺佢领军下15场赛事有11胜4和不败佳绩，连埋佢之前2度执教国家队，佢喺荷兰累积37场胜仗，亦追平艾禾卡特嘅荷兰赢波最多领队纪录。尹戈尔喺2014年带荷兰出战世界盃拎到季军，今届有力继续交出好表现。

尹戈尔赛後表示：「荷兰今场其实踢得好差，但系球员坚持踢法并且好有纪律，我哋只系畀到好少机会比利时，纪律性系今场赢波关键。」荷兰目前有法兰基迪庄、迪比同华基尔云迪积克等骨干，亦有加普、祖利安添巴等新星冒起，喺世界盃或会有一番作为。