上场联赛输波嘅热刺，周三(5日)凌晨欧联再次「死火」，作客只能够同法兰克福闷和0比0，目前喺D组3战得4分，仅以得失球压住法兰克福排第2位。热刺今仗全场只有1次中龙埋门，领队干地嘅防守踢法再受批评，但佢就坚持唔会改变风格。

热刺今场用番上仗「北伦敦打吡」输波嘅11人，哈利卡尼、孙兴民同李察利臣继续组成三叉戟，虽然进攻牌面相当华丽，不过热刺独沽一味嘅稳守突击战术，就浪费晒一班进攻好手，全场只有1次中龙埋门，比法兰克福嘅2次中龙更少，结果两队闷战0比0完场。

赛前干地回应佢嘅「龟缩战术」质疑：「我唔锺意踢得太开放，暴露太多空位而失6球、7球，我嘅教练生涯从未经历过(惨败)。我都赢过英超，我谂我知道点样教人踢波。」