比利时球会布鲁日成为欧联奇兵！周三(5日)凌晨B组赛事，布鲁日主场以2比0击败马德里体育会，成为比利时史上首支喺欧联头3场全胜球队，而欧联历来从未有球队赢晒前3轮後出局，布鲁日好大机会成功突围。

分组赛抽签之後，各界都睇好马德里体育会、波图同利华古逊3支名牌，布鲁日就被视为陪跑份子，不过呢支比甲劲旅表现令人惊喜，先系主场1比0赢利华古逊、作客再4比0大胜波图，今仗又喺主场2比0赢马体会，前利物浦门将米洛列特把守嘅大门3仗未失1球，同上季6场分组赛失20球嘅成绩系天壤之别！

今季由巴塞隆拿加盟嘅西班牙前锋祖格拿赛後表示：「击败西班牙球队系非常特别，我感激布鲁日令我有机会一尝欧联滋味，布鲁日仲会唔会出局？我唔知！未来仲有3场好重要嘅赛事等紧得哋。」同组另一仗波图2比0赢利华古逊，马德里体育会、波图同利华古逊依家同得3分，竞争激烈。