纽卡素自上年底获沙特阿拉伯财团入主後，成为欧洲其中一间最富贵球会，不过球队喺2个转会窗未有大事招揽「名牌巨星」，而系引入般奴古马雷斯、尼克普比、保治文等实而不华球员，加上实务型领队艾迪侯域执教，「喜鹊」已静静起革命，周一(24日)凌晨击败热刺後杀上第4位，喺2022年联赛得分亦排第5位。

纽卡素今季12场联赛只输1场，唯一败仗仲系作客利物浦喺97分钟被争议性绝杀，而且仲打和曼城、曼联同击败热刺，艾迪侯域赛後表示：「我为球员同呢支球队感到光荣，我哋嘅成功系建基於团队同球员个性，大家都以球队利益摆喺第1位，今场胜仗可以畀我哋更有信心向前迈进。」

数据显示，纽卡素喺2022年联赛拎到59分，全英超排第5位，比起车路士同曼联抢到更多分，而得分最多头7名正正就系传统Big 6加纽卡素，睇嚟球迷可能好快要改口叫「Big 7」啦。

2022年英超得分榜

1 曼城 69分

2 利物浦 67分

3 热刺 64分

4 阿仙奴 62分

5 纽卡素 59分

6 车路士 53分

7 曼联 47分