今晚世盃C组生死战，沙特阿拉伯决战墨西哥。沙特上仗净吞波兰两蛋，暂以3分跌落第3，想出线必须有分落袋；排榜尾嘅墨西哥更加唔使谂，佢哋不但要赢，仲要大胜先有出线机会，预计今场斗攻格局。论经验墨西哥始终胜一筹，而且佢哋近3仗世盃对亚洲球队全胜，客Ｗ信得过。（Now 619及617周四凌晨3时直播）

沙特首仗2比1反胜阿根廷震惊全球，但佢哋次仗未能延续气势，对波兰先失一球下，本来有扳平机会，可惜「沙特球王」艾达沙尼12码宴客，赛事末段再有後衞艾马尔基犯低级失误，被罗拔利云度夫斯基攻入「燕梳球」输0比2，现时与阿根廷同得3分，因得失球较差排第3位。形势上佢哋今仗赢波即可出线，和波就要望阿根廷喺另一边输畀波兰，所以都系靠自己，不过球员亦因此压力骤增，演出随时受影响。

墨西哥首仗0比0闷和波兰，次仗火并阿根廷一役，上半场改打前场逼抢其实发挥唔错，可惜後半段刻意缩後防线先畀美斯攻破大门，最终以0比2落败，两战仅得1分陷出局边缘。墨西哥今场和波都要出局，就算赢波，由於佢哋得失球系「-2」，必须大胜先有机会晋级，所以一定搏尽。翻查往绩，墨西哥喺世盃对住亚洲球队成绩甚佳，近3仗录得全胜，而且自1994世盃以来，佢哋已连续7届喺小组出线，自然唔想喺今届断缆，客胜靠得住。