克罗地亚上仗世界盃大胜加拿加4比1，前锋卡拉马历梅开二度，人气急升，呢位31岁射手曾经被嘲讽系「黑脚」，包括离开李斯特城後，「狐狸兵团」随即捧英超冠军，上届世界盃决赛後备上阵冇建树，睇住克罗地亚输波。估唔到4年後，卡拉马历成为克罗地亚史上第2位单场起孖嘅球员，踢出职业生涯逆转胜。

卡拉马历2015年1月由克罗地亚球会列积卡加盟李斯特城，由於季中加盟，下半季仅上阵13场英超入2球。

到咗2015/16年球季，卡拉马历上阵咗2场英超，就被外借去贺芬咸，唔符合最少上阵5次嘅攞牌标准，所以李斯特城该季捧英超冠军，佢都冇奖牌，实在非常遗憾。

卡拉马历转投贺芬咸後获得重生，特别系2020/21年球季，踢28场德甲入20球。卡拉马历上仗世界盃梅开二度，成为继2014年文迪苏杰後，克罗地亚史上第2位单场世界盃入2球嘅球员，强如获得1998年世界盃神射手嘅克罗地亚名将苏加都做唔到。

卡拉马历可以话系大器晚成，同时搣甩「黑脚」污名，克罗地亚周四(12月1日)晚对比利时，卡拉马历随时再有佳作。