欧洲劲旅德国喺今届卡塔尔世盃E组，只能够取得4分，最终屈居第3下，连续两届分组赛止步。虽然表现未如理想，不过德国足总冇谂住换帅，费历克将会继续留任，并带领「日耳曼军团」出战2024年欧国盃赛事。

据悉留住费历克嘅原因有两个，首先佢只系执教咗「日耳曼军团」1年半，德国足总认为今次成绩唔好嘅责任，唔可以完全赖落教练度，而一班球员都好信任佢；其次就系市场上欠缺更好选择，两大目标人物包括高普唔会离开利物浦，而杜曹又同一名足总高层有拗撬。

费历克如无意外将会率队出战2024年欧国盃，虽然继续「有得捞」，但德国足总方面希望佢可以详细分析球队现有问题，并好好作出改善，以争取更好成绩。