世盃喺到最後8强，热门球队都表现稳定，各路雄师相信球迷们都已「睇晒办」，孰强孰弱应该心中有数，依家最啱就系入定「冠军」同「决赛组合」，到时睇形势即场套戥，稳中求胜。

淘汰赛上线强队云集，建议冷吼「奇货可居」嘅荷兰。荷兰喺分组赛绝对系毫不起眼，先系「符碌」以2比0力挫塞内加尔，然後1比1被厄瓜多尔逼和，到最後2比0击败最弱东道主卡塔尔，3仗表现均不讨好，尤其1比1赛和厄瓜多尔一仗，被对手围攻，最终执番1分可说是相当好彩。

不过，要留意上述3仗，荷兰均系主攻一方，嚟到淘汰赛，老谋深算嘅「方丈」尹戈尔即时改变战术，3中坚留後、配翼衞反攻，任由该仗对手美国控球再打反击，效果极佳，以华基尔云迪积克为首嘅荷兰防线，完美演绎何谓铜墙铁壁，前线迪比、加普以至翼衞杜费斯，速度高、脚法好，绝对系反击战嘅关键人物。

荷兰防反战术够实际

荷兰嘅防反战术终於见真章，8强对手阿根廷虽然有球王美斯坐镇，但阿根廷不擅强攻，首战沙特阿拉伯就系最佳例证，加上佢哋控球嘅踢法，对一心打反击嘅荷兰极易「中伏」。

再者，阿根廷少帅史卡朗尼经验唔及已经「7字头」嘅尹戈尔，尤其喺往绩方面，近5次法定时间阿根廷对荷兰为3和2负，心态上阿根廷相当蚀章，预计荷兰可以再过一关，目前「橙军」冠军有11.5倍，绝对值得入手。

下线方面，则不妨博葡萄牙杀入决赛。法国同英格兰已喺8强交战，两军实力相若，两虎相争必有一伤，无论博哪队均有风险，倒不如向葡萄牙埋手。

决赛组合「葡-荷」有得谂

葡军早已於分组赛出线，最尾一战斗南韩尽出副选，养精蓄锐兼正选收起C朗下，喺16强更大破瑞士6比1，状态持续冒升，8强对手是实力稍逊嘅摩洛哥，要闯过呢关唔难，4强面对搏到残嘅英格兰或法国，葡萄牙可坐收渔人之利，其冠军赔率跌到得4.8倍，明显被睇好。决赛组合方面，「葡萄牙-荷兰」有13倍，宜趁早吸纳。