今晚英冠上演中游对决，伯明翰主场硬撼雷丁。伯明翰例踢闷波，雷丁喺曼联名宿恩斯执教下，最锺意初段同对手斗磨，谋定而後动，半场和更值博。

（有线601、661台周六凌晨4时直播）

伯明翰依家排第14位，联赛踢咗22仗赢得7场，表现中规中矩，而且只入23粒，场均入得1球，前屈福特前锋迪尼已经老化，前线只靠射手史葛贺根数胡，因此经常踢闷波，单计近5仗联赛，只得1胜3和1负，而上轮作客斗下游球队黑池亦互交白卷，硬净有余但欠取胜把握。

现居第8位嘅雷丁，既有曼联名宿恩斯执掌帅印，而佢囝囝汤马士恩斯则喺中场打骰，除此之外，亦有安祖卡路尔、沙恩朗、轩迪克等前英超球员助阵，不过安祖卡路尔同沙恩朗已走下坡，难怪22轮联赛入得24球，只系比伯明翰多1粒。因此恩斯在战略上会先求唔输，佢哋今季踢咗22仗联赛，竟有11仗开半场和，单计近7仗联赛，有6次半场握手言和，其中5仗半场波胆为0比0，可见雷丁初段极度保守，遇上同道中人嘅伯明翰，随时闷战一场，一於捧半场和，早啲收钱。