阿根廷勇夺世界盃冠军，除咗美斯居功厥伟之外，亦要多得唔少「绿叶」球员默默付出，包括决赛贡献1次助攻嘅阿历斯麦亚里士打，呢位效力英超白礼顿嘅中场原本寂寂无闻，但今届跃身成为阿根廷中场发电机，已吸引各大豪门注意，势必成为下月冬季转会市场抢手货。

现年23岁嘅阿历斯麦亚里士打，2019年1月由小阿根廷人加盟白礼顿，当时转会费仅700万镑，其後被外借去小保加，直至上季先至成为白礼顿主力，今季大熟大勇，踢14场英超入5球。

由於阿历斯麦亚里士打只系踢细球会，佢有份入选世界盃大军名单，令唔少人感到意外，特别系佢曾经遭国家队遗忘，今年年初先至获重召，距离对上1次入选相隔2年半。

阿历斯麦亚里士打用行动证明自己值得占国家队一席位，踢法瞻前顾後，分组赛对波兰射入1球，决赛妙传畀迪马利亚建功，自己亦有1次几乎单刀入波，球队可以夺冠，佢功不可没。

近日已传出多间大球会睇中阿历斯麦亚里士打、包括祖云达斯、马体会、车路士，车仔主帅朴达之前执教白礼顿，同阿历斯麦亚里士打合作无间，有意带埋佢过档上「车」，代替走下坡嘅佐真奴。

经过世界盃後，阿历斯麦亚里士打身价急升，起码值6,000万镑，车仔想签佢，必须大出血。