曼城日前喺英联盃淘汰利物浦杀入8强，多名有份踢世盃嘅国脚都有上阵，不过中场加云菲腊斯就离奇「失踪」，领队哥迪奥拿证实呢位英格兰国脚因为「超重」，被勒令禁止参加操练同比赛，要等佢减磅成功後先可以候命，哥迪奥拿对佢明显非常不满。

英格兰喺世盃8强出局後，一众国脚都有10日休息时间，但当众星归队嗰阵，加云菲腊斯竟然变咗个大肥仔，哥迪奥拿表示：「菲腊斯冇受伤，佢返到嚟就超重，我都唔知点解。佢依家嘅身体状态唔能够练波或者比赛，所以我冇畀佢上阵，当佢回复正常就会踢，球队亦好需要佢嘅候命。」

曼城喺英联盃3比2赢利物浦一仗，加云菲腊斯连大名单都未有入选，但佢嘅英格兰队友菲尔科顿、基亚利殊同史东斯都有份登场。曼城下场联赛会系周四(29日)凌晨对列斯联，加云菲腊斯可唔可以倒戈上阵仲系未知数。