葡萄牙球星C朗拿度落实加盟艾纳斯後，周二(3日)坐私人飞机正式「空降」沙特阿拉伯，心情大靓嘅C朗全程表现风骚，艾纳斯亦为佢安排盛大欢迎仪式，据报C朗会喺亮相典礼後参加公开操练，已有10万球迷扑飞入场睇佢首次练习，人气爆灯。

C朗今次签约艾纳斯，据报年薪达破世界纪录嘅1.73亿镑，呢位前锋周二喺家人陪同下坐私人飞机到达沙特，旅程中更风骚拍片摆IG，笑晒口兼单眼向球迷表示：「老友，阵间见！」艾纳斯亦宣布会举行欢迎派对，C朗到达利雅得後即有小球迷献花，街上亦有唔少欢迎C朗嘅巨型广告板。

报道指C朗喺利雅得，会先进行第2阶段体测，之後会出席亮相仪式同参加公开操练，艾纳斯嘅沙特国王大学体育场可以容纳25,000球迷，但扑飞球迷就多达10万人。C朗会喺训练入面同法国教练鲁迪加西亚首度见面，首演预计会系1月15日作客艾沙比。