周二(3日)凌晨英超赛事，利物浦後防错漏百出，作客被宾福特打爆惨输1比3，依家落後第4嘅曼联4分兼踢多1场，争入前4之路受到重大打击。利物浦领队高普赛後闹爆宾福特踢法「嗱喳」，又推又撞挑战球例底线，对球证执法非常不满。

利物浦新兵加普今场未能候命，达云纽尼斯早段曾有射门被救空门，不过之後面对宾福特嘅角球攻势就完全招架唔住，19分钟伊巴希马干拿迪先摆乌龙；宾福特随後再有2次角球都成功将个波送入网，但都因越位在先食诈胡，但利物浦捱唔到返更衣室，42分钟再被尤尼韦沙头槌顶入。

半场期间高普一口气换入3人，连中坚华基尔云迪积克都被收起，「红军」喺50分钟由阿历士张伯伦头槌追番1比2，不过球队後防始终顶唔住宾福特嘅冲击，84分钟麦比奥莫反击撞赢伊巴希马干拿迪，单刀射成3比1锁定胜局。

高普赛後对宾福特嘅战术有微言，形容佢哋系挑战球例底线：「利物浦嘅表现绝对唔系完美，但佢哋好多时候又推又拉，明显挑战球例底线，呢个系宾福特进攻死球咁成功嘅原因......防守嗰队就唔可以咁做，因为我哋喺自己禁区，照做就会输12码。拉人就系拉人、推人就系推人，好似第3球佢我完全唔明点解冇犯规，呢点我都想球证解释一下。」