法国足总日前官宣迪甘斯续约，将继续领军到2026世盃，一直希望接手法国队嘅施丹好梦落空，法国足总主席利格列却口不择言，言语上冒犯施丹，事件引起轩然大波，包括麦巴比及法国名宿群起攻之，最终利格列要向施丹道歉。

内讧系法国队传统，但今次矛头指向足总主席，81岁嘅利格列衰多口，公布迪甘斯续约留任，佢接受传媒访问时，关於巴西国家队邀请施丹执教，利格列竟然咁样回应：「我唔在乎！佢可以佢任何地方，执教国家队或球会，我同施丹冇联络，不过就算佢搵我，我都唔会听佢电话！」

就因为呢番说话，激起法国球圈怒火，球坛中人及球迷都认为利格列言语冒犯施丹，纷纷发言围插。基利安麦巴比表示：「施丹代表法国，唔可以对呢位传奇咁唔尊重。」法国体育部长卡斯特拉表示：「佢嘅言论唔适合，这是可耻、缺乏尊重，让我们感到冒犯，作为足总主席唔应该咁讲嘢，佢应该向施丹道歉。」

仲有其他名人，例如列贝利、施斯、佐卡夫等名人都发声，怒斥利格列唔尊重。法国传媒报道，被围插嘅利格列最终跪低，就自己言论向施丹道歉。