欧洲各大豪门向来重视中国市场，每逢农历新年都会推出各种贺年活动，英超劲旅曼城近日率先宣布推出「兔年波衫」，除咗印上大大个兔仔图案，波衫设计更以月亮为主题，庆祝埋中国月球探测器「玉兔号」成功执行登月任务10周年。

曼城同波衫赞助商PUMA合作推出「新春波衫」，设计以深篮色同金边为主，想将「蓝月亮」同中国文化结合，除咗庆祝即将来临嘅兔年，衣领位置亦印上「44.12°N 19.51°W」座标，即系2013年「玉兔号」成功登陆月亮嘅地理座标。

虽然派晒艾宁夏兰特、奇云迪布尼等王牌球星做波衫Model，不过依然引起不满，球迷唔系唔锺意件波衫设计，而系唔满意呢件价值70镑嘅限量版波衫，只系用嚟收藏而唔会喺正式比赛使用，唔少网民留言话想将呢件衫变成作客球衣或第3号球衣。