曼联前锋拉舒福特今季状态大勇，喺奥脱福球场更加如有神助，周三(11日)凌晨英联盃对查尔顿後备上阵再入2球，系佢连续第8场主场赛事有波入，超越朗尼喺2012年连续7场主场入波纪录，如果「福仔」下仗对曼城再入波，就会追平传奇射手华奥历连续9场奥脱福入波嘅球会纪录。

拉舒福特近期弗到漏，世盃後6场比赛都有入波(共7球)，而且喺奥脱福出击特别醒神，自上年10月欧霸盃对舒列夫入波後，之後每场主场赛事都有「士哥」，对手包括韦斯咸、阿士东维拉、般尼、诺定咸森林、般尼茅夫、爱华顿同查尔顿。

「福仔」今季各项赛事已入15球，只系踢咗半季已经录得个人第3「多产」球季，要打破自己19/20球季入22球嘅纪录指日可待。曼联领队坦哈格亦大赞爱将：「由我第1日加盟，已经觉得拉舒福特系最重要球员，我唔想失去佢，佢喺曼联嘅计划之内，一定会继续留队。」