周一(16日)凌晨喺沙特阿拉伯上演嘅西超盃决赛，巴塞隆拿凭2位新星加维、柏迪各建一功，加上罗拔利云度夫斯基嘅入波，3比1击败皇家马德里第14度捧盃，亦系教练沙维上任後首个冠军，而且巴塞隆拿仲可以袋走400万欧元冠军奖金，名利双收！

巴塞隆拿今场赢得意外地轻松，控制战局下33分钟前场逼抢成功，罗拔仔交畀後上嘅加维射入，完半场前加维投桃报李，助攻罗拔利云度夫斯基射成2比0。下半场巴塞仍然主导比赛，柏迪69分钟射成3比0，皇马去到补时阶段先靠宾施马破蛋，但无阻巴塞赢3比1捧盃。

今次系沙维自2021年11月接掌巴塞帅印後，为球队赢得嘅首个冠军，佢喺赛後表示：「巴塞比皇马更需要呢个冠军，我为球员感到开心，佢哋好努力，呢个冠军系佢哋应得。比起捧盃，我更加在乎夺冠嘅过程，我睇到每个球员对冠军嘅渴求，希望今次捧盃会系一个转折点。」