爱华顿周六(14日)英超主场1比2不敌修咸顿，自1958年来首次经历联赛主场4连败，「拖肥糖」依家同修咸顿、韦斯咸同得15分包办3个降班位置，赛後大批球迷拒绝离场，留喺葛迪逊公园球场内外抗议，而爱华顿主席、行政总裁等多名高层，更因为「人身安全威胁」而未有到场。

爱华顿今季成绩差劲面临降班，球迷赛前已计划喺完场後进行抗议，而球队喺半场领先情况下，1比2反输畀榜尾球队修咸顿，更令球迷愤怒情绪升温，完场後大批球迷留喺看台抗议，要求林柏特辞职、班主卖盘等等，亦有球迷向球员高呼「你哋唔配着起呢件波衫！」

面对球迷怒火，爱华顿主席简胡礼、行政总裁芭仙达尔等4名高层，喺保安劝告下决定唔去现场睇波，因为佢哋出现会令人身安全受到威胁，呢个举动亦令爱华顿球迷非常不满。爱华顿领队林柏特赛後表示：「球队依家处於困难时刻，我唔想评论呢啲事(高层甩底)，只系集中喺比赛上，我听到外界嘅意见，我哋要继续努力工作。」