周日(15日)凌晨英超大战，今季战绩沉沦嘅利物浦跌入谷底，作客白礼顿惨吞3蛋，连续2场联赛输波後跌到落第9位，领队高普完场後向作客入场嘅球迷道歉，批评球队表现系「史上最差」。

利物浦今场有新兵加普首度英超上阵，不过「红军」全队表现令人失望，被白礼顿嘅反击处处克制。利物浦上半场仲顶住0比0，但换边後兵败如山倒，苏利马治喺46分钟同53分钟连入2球，81分钟韦碧克个人表现，1剔1射入波尽显功架，带领白礼顿大胜3比0。

高普完场後走去场边向客场球迷致歉，佢赛後表示：「踢得好差，非常差，我印象中冇见过一场更差嘅表现，而且唔单止系利物浦，呢场真系球队嘅最低点，白礼顿踢得更加好，佢哋完全值得赢波。」