周六(28日)西甲赛事，巴塞隆拿作客1比0击败基罗纳，继续稳坐联赛「1哥」位置，今场巴塞赢波英雄又系20岁新星柏迪，佢连续第2轮一箭定江山帮球队拎晒3分，教练沙维赛後直指柏迪已经系「世界最佳中场之一」。

巴塞今场控制战局，不过制造机会次数唔多，奥士文尼迪比利更喺上半场伤出，由柏迪代替上阵，亦系呢位小将第100次为巴塞喺正式赛事披甲。继上轮联赛一箭定江山赢基达菲後，柏迪今场61分钟再趁基罗纳门将扑波甩手，门前射入全场唯一入球。

Opta数据显示，自从沙维出任巴塞教练後，柏迪11次命中目标攻门就入8球，入球转化率高达72.7%，沙维赛後大赞：「柏迪已经系可以改变战局嘅球员，睇埋佢入波同助攻数据，我哋讲紧嘅系一个20岁球员，已经成为自己位置入面世界最佳球员之一。」