皇马教练安察洛堤上季领军捧西甲及欧联冠军，曾经风光一时，但「银河舰队」今季成绩走样，喺联赛已落後榜首巴塞隆拿8分，加上早前失落西超盃。西班牙媒体《relevo》爆料，指皇马会长皮里兹已经失去耐性，如果球队未能夺得今届世冠盃冠军，「肥安」好大机会季尾执包袱。

据悉皇马上月中西超盃决赛1比3不敌巴塞隆拿之後，管理层开始对安察洛堤失去信心，认为球队喺佢率领之下，根本冇能力同宿敌巴塞抗衡，其後「银河舰队」喺联赛被巴塞隆拿进一步抛离，更加印证管理层睇法无错。

皇马会长皮里兹一向炒教练唔手软，如果安察洛堤无法喺短期内协助球队走出低谷，就会喺季尾换帅，必要时甚至提早解雇呢位意大利名帅都唔出奇。

世冠盃成绩成为决定安察洛堤前途嘅重要指标，皇马近4次参加呢项大赛，都可以夺冠而回，若然今届断缆，「肥安」的确好难交代。安察洛堤曾於2013至15年执教皇马两季就被炒，佢第2度成为「银河舰队」主帅，刚好来到第2季，恐怕又就快够钟走人。