土耳其周一(6日)发生黎克特制7.8级地震，造成过万人伤亡，土超球员亦难幸免於难，曾经效力车路士、纽卡素等多间英超球会嘅基斯甸艾素，据报被困喺废墟当中，目前消息众说纷纭，球会总监兼土耳其名将迪米雷，更喊住拍片恳求外界支援。

31岁嘅基斯甸艾素效力土超球会哈塔斯堡，上场联赛97分钟绝杀帮球队赢1比0後，随即遇上大地震，佢同球会体育总监沙禾特都失踪，据报2人正被困喺倒塌嘅建筑物下面，土耳其方面正全力搜救。目前消息众说纷纭，英国《衞报》曾指基斯甸艾素已被救出，并送去医院接受治疗，但哈塔斯堡消息就否认，表示：「好不幸，搜救行动仍然进行中。」

纽卡素、车路士等基斯甸艾素前球会，都喺社交网发文祈祷救援成功，哈塔斯堡技术总监迪米雷更喺IG开直播呼吁：「救救我哋！请带晒你哋嘅资源嚟帮我哋......唔该你、唔该你，呢度嘅人已奄奄一息......」另外，土耳其乙组一名门将杜斯兰亦失踪，生死未卜。