曼联件7号波衫向来系神圣号码，佐治贝斯、笠臣、简东拿、碧咸到C朗拿度都曾经系「红魔」7号主人，随住C朗离队，依家件7号波衫目前冇人咁掂，冬天加盟嘅韦格贺斯同沙比萨原本有权拣7号，但佢哋最终选择27号同15号，据报件7号波衫原来暗地已展开争夺战，3位新星都虎视眈眈。

英国《太阳报》报道，曼联阵中3位球星都有意喺下季转着7号，包括查顿辛祖、安东尼马菲奥斯同小将加拿祖。查顿辛祖以往喺多蒙特都系着7号，虽然嚟到曼联後负评居多，但近期复出有复苏迹象，如果佢可以踢返喺德甲嘅水准，绝对有力成为曼联主力。

另一热门人选系阿根廷新星加拿祖，佢依家着紧49号，下季必定会转着「细冧把」，佢依家同曼联倾紧新合约，除咗会大幅加薪之外，亦唔排除会用7号波衫嚟做筹码，显示捧佢做曼联王牌嘅信心。至於安东尼马菲奥斯就被视为冷门选择，呢位巴西国脚更大可能会转着格连活特嘅11号。