曼联中坚利辛度马天尼斯今季登陆英超後，表现大获好评，绰号「屠夫」嘅佢以踢法狠辣见称，不过经常有唔少挑衅小动作非常踩界，周四(9日)对列斯联一仗，佢疑似抽水用鞋底踩落班福特块面，动作非常肉酸，VAR亦有检查事件，但最终竟然冇作出处罚，引起球迷公愤。

事件发生喺完半场前，当时班福特同利辛度马天尼斯争波相撞倒地，两人缠埋一齐，但利辛度马天尼斯起身嗰刻，突然「顺势」虎尾脚踩落班福特块面，令对方痛苦惨叫，VAR即时介入审查，但未能证明利辛度马天尼斯系蓄意踢人，令佢可以逃过一劫。

不过公道自在人心，大批网民亦群起声讨：「佢只脚踢得咁唔自然，冇红牌真系难以置信」、「层夫个名唔系浪得虚名」、「马天尼斯唔红牌冇天理」......前列斯联球星碧福特表示：「利辛度马天尼斯故意踢班福特，佢系呢种暗黑踢法嘅大师。」曼联球星奥云亦表示：「有心定无意？利辛度马天尼斯绝对知道自己做紧乜。」