今晚西甲有场独脚戏，爱斯宾奴主场硬撼3哥皇家苏斯达。爱斯宾奴虽要为护级抢分，但主场战绩不济，有地利都难睇好；皇苏上轮输波一肚气，誓要搵「私房菜」发泄，一於捧客胜。（周二凌晨4时开赛）

位处下游嘅爱斯宾奴，复赛後略有起色，近6场联赛取得2胜3和1负，包括作客打和同市宿敌兼榜首巴塞隆拿。不过佢哋主场就失威啲，今季10仗主场联赛，只得2胜4和4负，主场成绩排尾3，而且仅入12粒，攻力疲弱，上仗喺地头打和奥沙辛拿1比1之役，更有後衞皮尔加比尔被逐，今晚要坐波监，可谓雪上加霜。

另一边厢，皇苏今季异军突起杀入前3，虽然上轮爆冷输畀弱旅华拉度列，令7仗联赛不败走势告终，但查实全场揿住对手嚟攻，赢形势输波坚唔够运，就算老将大衞施华有伤未必出得，但「日本美斯」久保建英已凭表现站稳正选，射手阿历山大索洛夫近7仗联赛入5粒，今晚又有机会数胡。翻查纪录，两军近6次交锋，皇苏取得5胜1负，摆明恰惯爱斯宾奴，今仗遇上「私房菜」，必定趁热起筷，一吐上仗输波乌气，客Ｗ不容错过。