巴塞隆拿周五(17日)凌晨欧霸盃附加赛主场2比2打和曼联，虽然比数上未分胜负，但今场付出嘅代价非常沉重，柏迪上半场大腿拉伤提早退下火线，加维亦累积3面黄牌要自动停赛，次回合作客奥脱福冇咗呢对「双子星」，唔少巴塞迷都好悲观，认为好可能会被曼联大炒。

巴塞今季喺西甲排榜首，柏迪同加维呢对年轻中场组合系灵魂人物，被誉为新版「沙维+恩尼斯达」嘅佢哋，今场都行衰运，柏迪完半场前拉伤右脚大腿肌肉，《阿斯报》消息指佢会休战1个月，而加维亦喺比赛尾段拎黄牌要停赛，加上养紧伤嘅奥士文尼迪比利同布斯基斯，巴塞次回合只能残阵出战。

英国《太阳报》引述部份巴塞球迷悲观留言：「几乎肯定出局」、「今场系灾难，进攻冇效率，防守立立乱，冇埋柏迪、加维，几乎等於残废」、「次回合冇加维、柏迪、迪比利同布斯基斯，我已经预示曼联会数我哋4球」。