英超劲旅曼联今个夏天最大目标，系收购一名顶级前锋带领球队争冠，哈利卡尼、域陀奥森汉等星级名字都同「红魔鬼」扯上关系，不过英国着名记者Ben Jacobs日前爆料，话曼联领队坦哈格非常心仪罗马前锋谭美阿巴谦，如果签唔到首选目标，亦好乐意将佢带嚟奥脱福。

据Ben Jacobs爆料：「曼联想买拿玻里嘅域陀奥森汉，车路士都想签佢，域陀奥森汉今季喺意甲踢到晓飞，转会费会相当惊人，而且拿玻里拎到意甲冠军嘅话，亦唔保证会放人。对曼联嚟讲，谭美阿巴谦就系Plan B，坦哈格好锺意佢，曼联对佢有浓厚兴趣。」

25岁嘅谭美阿巴谦系车路士出身，上季登陆意甲有17个联赛入球，不过今季喺罗马表现大跌，依家只有6个联赛入球，曼联球迷对呢个Plan B就非常不满，认为佢嘅级数同域陀奥森汉落差太大，唔够班做曼联正选箭头。