车路士今季用超过6亿镑买人，不过成绩反而愈踢愈差，周日(19日)凌晨英超主场0比1不敌包尾嘅修咸顿，今年10场赛事只得1胜，领队朴达更成为自荷度之後，近27年车路士胜率最低领队，球迷要求将佢炒鱿嘅声音日益高涨！

车路士上周中欧联输波後，今场大玩轮换收起列斯占士、堤亚高施华、夏维斯同梅迪历等球星，表现仍然令人失望，上半场补时阶段禁区外输罚球，修咸顿「罚球王」禾特普斯妙射破网。车路士换边後急起反扑，但创造力同把握力都欠奉，最终输0比1完场。

朴达自上年9月接手车路士後，执教25场赛事只得36%胜率，系自1993至96年嘅荷度(34%胜率)之後，车路士胜率最低教头，同前任主帅杜曹嘅60%胜率差天共地。朴达赛後表示：「喺主场输0比1，受到批评系好正常，我哋尝试畀年轻球员融入英超，但拎唔到成绩就会好困难，我唔会自大到话外界声音唔重要，但我嘅工作系同球队一齐努力度过难关。」