效力巴黎圣日耳门(PSG)嘅摩洛哥球星阿舒拉夫，日前被一名女子指控强奸，虽然该名女子报警後选择唔提出控告，但法国警方就因为案件嘅严重性，决定自行展开调查。不过阿舒拉夫就非常淡定，周二(28日)照常出席FIFA颁奖礼，而且仲有奖拎添！

据法国《巴黎人报》报道，一名女子周日(26日)向警方报案，声称上周六(25日)被阿舒拉夫强奸。消息指两人今年1月底喺IG认识，阿舒拉夫上周六趁老婆同仔去杜拜旅行，邀请该女子去佢位於布洛涅嘅豪宅。女子报称去到後，阿舒拉夫即强吻佢嘅嘴同胸，之後将佢强奸，女子之後踢阿舒拉夫只脚後逃走，再通知朋友接应。

不过女子报警之後，表示只系想将事件公开，并冇打算提出控告，但法国警方认为案情严重，将会继续进行调查，目前未有作出任何检控，而PSG同阿舒拉夫亦冇就事件作出回应。阿舒拉夫周二出席FIFA颁奖礼，领取年度最佳11人奖项。