去年夏天几乎加盟曼联嘅「白普巴」拉比奥特，同祖云达斯合约於今夏届满，意媒报道，呢位法国国脚可能自由身离队，现时曼联同利物浦都关注佢嘅情况。

意大利记者斯基拉报道，拉比奥特2019年以自由身加盟祖云达斯，转眼间已经踢咗4个球季，共上阵158场入13球，当中7球系今季射入，而佢喺卡塔尔世盃亦喺法国队出任中场，近况出色，依家只系27岁，仲有大把世界。

拉比奥特去年夏天曾经同曼联扯上关系，当时红魔斟介法兰基迪庄触礁，希望另觅中场，就同拉比奥特联系上，但此子人工叫价太高而搁置，其後曼联转斟卡斯米路，并顺利签入。

呢位法国球星仲有另一麻烦，就系佢嘅阿妈兼经理人成日搞搞震，不过近期佢阿妈似乎有所收歛，唔再说三道四，对佢搵班落肯定有帮助。