曼联喺上场英超「双红会」惨吞利物浦7蛋，令一班「魔迷」面目无光，近日更有一段赛前影片曝光，令曼联球迷睇到眼火爆！曼联前锋韦格贺斯被影到喺开波前，同利物浦球员一齐做出触摸通道上经典嘅「This Is Anfield」标志，而佢事後解释更被批评九唔搭八，球迷齐齐呼吁要踢佢走。

晏菲路球场嘅出场通道上，有个经典「This Is Anfield」标志，除咗系粉丝打卡景点，多数「红军」球员出场前都会摸一下个标志以示尊敬，但「双红会」赛前影片所见，当曼联前锋韦根贺斯行到标志下面，竟然同利物浦球员一齐伸手去触摸，曼迷亦翻出旧帐，指韦格贺斯早喺2018年嘅访问，已经讲过「梦想为利物浦效力」。

最惨嘅系，韦格贺斯1月以借用身份加盟曼联後，7场联赛全食白果，大批曼迷闹佢系「利物浦卧底」，指季尾借用期满後一定要将佢踢走。眼见球迷反应激烈，韦格贺斯亦公开解释：「通常我唔会回应社交网嘅事，但今次要出嚟澄清，因为曼联球迷对我嚟讲好重要。我喺荷兰国家队知道，华基尔云迪积克喺比赛前会摸个标志，我只系打算挑衅性伸手阻止佢咁做......我细个支持嘅球队系川迪，亦非常荣幸能为曼联效力，我对球会嘅忠心唔应该受到质疑。」不过曼迷普遍拒绝接受呢个解释，直指韦格贺斯九唔搭八。