曼联中场般奴费南迪斯球技一流，可惜脾气同比赛态度就受到质疑，英国传媒指部份队攲对呢位葡萄牙球星有所不满，球会亦对佢成为曼联下任队长有所保留。不过曼联领队坦哈格，日前公开力撑般费继续戴队长臂章，并为般费最近嘅表现解释：「无人完美！」

曼联喺英超输畀利物浦0比7一役，般费嘅表现令球迷失望，推旁证、插水、埋怨队友等行为受到猛烈批评，加利尼维利、坚尼等名宿都质疑佢嘅队长资格，但坦哈格回应：「般费有一个杰出嘅赛季，曼联有依家嘅成绩，佢喺队中角色非常重要。般费带畀球队能量，唔单止不断跑动，仲系最高强度同正确嘅跑动，佢教导其他球员，成为队友嘅模范。」

坦哈格表明喺哈利马古尼缺阵下，般费将继续戴上队长臂章：「冇人系完美，所有人都会犯错，般费会喺错误中学习，因为佢好聪明，我好满意佢喺队中嘅表现，哈利马古尼缺阵嗰阵佢会继续做队长。」