热刺喺欧联16强出局後，今季几乎肯定再次「4大皆空」，唔少球员表现都令人失望，季前以6,000万镑转会费加盟嘅李察利臣，赛後就向巴西媒体作出爆炸性访问，炮轰干地嘅排阵，形容热刺今季系「垃圾」。

李察利臣喺周四(9日)对AC米兰一仗後备上阵踢20分钟，未能阻止球队出局命运，佢赛後接受巴西《TNT Sports》访问大爆发：「我唔明点解我系後备，球队之前踢得好好，连赢韦斯咸同车路士(李察利臣均任正选)，突然间又将我摆落後备，对狼队只系畀我踢5分钟，我问领队点解？佢哋冇答过我。」

对於今场欧联做後备，李察利臣亦非常不满：「我唔明干地嘅决定，佢赛前叫我做测试，冇问题嘅话会正选上阵，结果比赛嗰阵我又系後备，即管睇下干地听日讲乜，但我唔会被愚弄。总结今季，可以用垃圾嚟形容，因为我冇得上阵，或者我受到伤患影响，但每次落场都搏埋条命，我明明连续2场正选都踢得好，我觉得正选系我应得。」