周四(9日)凌晨欧联16强次回合，有美斯同基利安麦巴比领军嘅巴黎圣日耳门(PSG)，作客再吞拜仁慕尼黑双蛋，两回合合计输0比3出局，亦系球队近7届欧联入面，第5次喺16强阶段出局，欧联冠军梦仍未能实现。有传季尾约满嘅美斯将会离队，今场可能系呢位4届冠军最後1次喺欧联赛场亮相。

首回合输0比1嘅PSG，上半场表现颇具侵略性，基利安麦巴比同美斯喺早段都有埋门，可惜未能把握，38分钟更出现黄金机会，阿舒拉夫逼甩拜仁门将恩尼森马脚下球，但域天拿射空门力度同角度都唔够，结果畀马菲斯迪历特喺白界前及时解围，半场两队踢成0比0平手。

下半场PSG焗住推前，後防出现更多漏洞，61分钟拜仁前场逼抢成功，祖普莫亭无人看管下轻松射入，大势已去嘅PSG喺完场前1分钟再失守，基拿比接应祖奥简斯路斜传射成2比0，两回合合计拜仁赢3比0晋级8强。美斯加盟PSG两季都喺欧联16强出局，亦系球队近7年第5次喺呢个阶段毕业。

PSG教练加迪亚赛後表示：「结果令人好失望，可惜我哋都要接受呢个现实，虽然首回合出现好多困难，但我哋对次回合仍然抱有好大希望，如果上半场把握到机会先入波，情况就会好唔同。我唔知今次出局系咪球队需要嘅学习过程，但真系好失望，依家要集中喺法甲争冠。」

35岁嘅美斯赛後亦成为焦点，佢同PSG嘅合约到季尾就完结，续约谈判亦迟迟未有进展，盛传美斯可能会去美职或中东联赛效力，如果传闻属实，今仗好大机会系美斯最後1次喺欧联赛事亮相。法国传媒指随住PSG出局，美斯嘅去向决定可能会喺短期内出现。