曼联队长哈利马古尼近年经常受到批评，今季更加失去正选位置，不过呢位英格兰国脚就踏实面对，上场对爱华顿佢复任正选，再次助球队赢波兼保持不失。数据显示，哈利马古尼近10次正选上阵，曼联系10场全部赢晒！

哈利马古尼表示：「我唔会话我好锺意依家嘅状况，所有球员都希望场场都有份踢，就好似我过去8年咁，但我亦会尊重领队嘅决定、尊重呢间球会中坚位置嘅竞争，当机会嚟到，我就要交出最好表现去帮助球队赢波。」

上场赢爱华顿，系哈利马古尼今季各项赛事第13次正选上阵，除咗季初3次担正输波外，最近10次正选「红魔鬼」全胜，哈利马古尼亦信心爆棚表示：「曼联季尾有好多赛事，我嘅心思全部放晒喺比赛上，赢英联盃冠军嘅滋味好好，我想再拎多2个冠军！」