车路士今季疯狂买人兼换咗3次领队，但系表现就愈嚟愈差，周六(15日)英超主场1比2不敌白礼顿後，主帅林柏特回巢即经历3连败。「罪魁祸首」嘅保利今仗被史丹福桥球场嘅球迷狂嘘，呢位美国班主更被影到同球迷嘈交，场面相当肉酸。

林柏特回归车路士任看守领队到季尾，上任头2场即输畀狼队同皇家马德里，主场面对白礼顿亦处於捱打状态，虽然13分钟意外由干拿加历查入波领先，但技高一筹嘅白礼顿完半场前由韦碧克追平，69分钟再由安斯素轰入世界波反败为胜，亦赠林柏特3连败。

现场睇波嘅班主保利成为众矢之的，不断受到球迷狂嘘兼辱骂，呢位班主更一度沉唔住气，靠向看台边同上层球迷争执闹交。据报保利对球队表现非常不满，赛後入更衣室向球队「训话」超过1个钟头。林柏特赛後表示：「球队嘅表现比起战果更令人失望，要有好表现先会有机会赢波，我哋今场系被技术性击倒，呢样先系最失望。」