曼城周四(27日)凌晨大战阿仙奴，系今季英超冠军决定性一战，哥迪奥拿同阿迪达嘅师徒对决再成焦点，不过数据显示，两师徒之前曾经9次对决，哥迪奥拿有8胜1负嘅压倒性优势，难怪球迷一致睇好曼城可以赢波。

阿迪达喺2019年12月，由哥迪奥拿嘅助教摇身一变成为阿仙奴主帅，虽然「兵工厂」喺佢领导下进步神速，但每次师徒碰头都系哥迪奥拿技胜一筹，两人领军下各项赛事9次交锋，哥迪奥拿赢出8次，阿迪达只系喺2020年英足盃4强赢过师傅。

哥迪奥拿赛前讲到两人关系：「我哋嘅关系改变咗，依家唔会好似以前咁成日见面，因为佢喺伦敦，我喺曼彻斯特，而且大家都非常忙碌。不过我同阿迪达之间嘅感情同尊重系永远唔会变，呢点我哋都心知肚明。」