皇家马德里周日(30日)凌晨西甲，主场4比2大破艾美利亚，法国前锋宾施马个人连中三元，亦系佢喺今个月内第3次「戴帽」。皇马「三叉戟」宾施马、云尼斯奥斯祖利亚同洛迪高高斯今场合作无间，火力全开誓要喺欧联4强狙击曼城！

皇马喺西甲衞冕机会渺茫，不过为欧联做准备仍然唔可以放松，今仗5分钟就先拔头筹，云尼斯奥斯祖利亚左路突破，传中畀宾施马门前射入；17分钟到右翼洛迪高高斯表演，佢右路底线巧妙过人後，传 中畀宾施马轻松扫入；完半场前宾施马主射12码完成帽子戏法。补时阶段艾美利亚破蛋，但洛迪高高斯47分钟再入1球，客队61分钟追番1粒只系挽回多少面子，皇马最终仍赢4比2。

宾施马喺4月份大爆发，先後对华拉度列、车路士同艾美利亚连中三元，今场亦令宾施马喺皇马累积入球突破350大关(352球)，系C朗拿度之後皇马第2个达到呢个里程碑嘅球员，赛後获会长皮里兹送纪念波衫。皇马教练安察洛堤赛後表示：「我哋前锋三叉戟非常出色，佢哋扭波非常犀利，现代足球愈嚟愈少见，如果球队搞掂埋防守，将会有好好嘅成绩。」