气势如虹嘅曼城向英超冠军又行前一步，「蓝月亮」周四(4日)凌晨主场3比0大胜韦斯咸，以1分力压踢多场嘅阿仙奴重登榜首，射手艾宁夏兰特今场再有入波，今季累积35个联赛「士哥」，打破舒利亚同高尔保持嘅纪录，成为英超史上单季入波最多球员，赛後曼城一众队友列队向佢送上最高致敬。

已掌握争霸主导权嘅曼城，今场围攻有迪格兰赖斯缺阵嘅韦斯咸，但基亚利殊劲射被扑出，洛迪卡斯简迪单刀又射中内柱弹出，半场闷和0比0。换边後曼城开Turbo，尼敦阿基50分钟接应罚球顶入，75分钟艾宁夏兰特单刀笠射成2比0，菲尔科顿完场前窝利抽射省中人弹入，助曼城大胜3比0完场。

今场主角绝对系挪威前锋艾宁夏兰特，今仗拎到今季第35个英超入球，喺仲有5轮未踢之下，已打破英超史上单季最高入球纪录，而且旧纪录保持者(34球)舒利亚同高尔，都系喺踢42场嘅球季创造纪录，更加显得艾宁夏兰特嘅纪录难能可贵。

完场後曼城领队哥迪奥拿，带领一众职、球员都喺球员通道之外列队，恭送新任英超「士哥王」离开球场，哥迪奥拿赛後表示：「夏兰特系个难以置信、独一无二嘅人，佢绝对值得我哋列队致敬，因为佢达成一个神奇里程碑，或者有一日佢会再打破自己呢个纪录。」

艾宁夏兰特赛後亦搞笑回应：「呢次列队致敬其实几痛苦，因为佢哋个个都打我背脊，但我觉得非常开心。」被问到有冇打算破迪斯甸恩喺1927/28球季所创英格兰顶级联赛入球纪录(60球)，艾宁夏兰特表示：「我哋唔可以成日谂入球纪录，如果唔系我会发癫！」